بسم الله الرحمن الرحيم
الموضوع في غايه الخطوره والسفاخه والشلاخه..ومهم جدا ...لو حريص علي ابنك..اقراه من اوله لاخره
-----------
تبقي البنت " اربع سنين " واقفه علي كرسي في المطبخ....بتحاول تغسل اطباق..مساعدة لامها
تيجي امها زي الغول المتوحش..!! : بتعملي ايه يخربيتك .....انزلي من هنا ...انزلي !!!!!!
تتسائل البنت في جوف قلبها وعقلها ..لماذا ؟؟ ...فتقرر انها
...
تسأل امها : لماذا ؟؟؟
تقول لها امها : انت عايزه تكسريلي المطبخ....اياكي اشوفك هنا تاني !!!
فيتكون سلبيا عند الطفله محاولتها لمساعده امها.....هي مجرد تكسير للمطبخ..ومتعملش كده تاني
------------
يكون الاب جالس ..يتناقش مع محسن بيه " راجل مهم " .. فيقولو .والله احنا كزا كزا بس مرضيناش نكزا كزا
..عشان كزا كزا وحش متجيبوش منه
فيجي ابن الاب ..الصغير ذو السبع سنوات قائلا : طب متجربوا كزا بالجبنه ..حلو والناس بتستعمله !!!!
فيرد عليه الاب..كتنين ذو مئه واربعين جناح كوري الصنع : انت بتتكلم ليه !! انت مش شايفني انا وعمو بنتكلم كلام كبار ؟!!
الابن المسكين يتسائل في جوف قلبه وعقله : انا بتكلم ليه ؟؟ قبيح انا يعني عشان متكلمش ...
وبعدين كلام كبار ايه ...بيتكلموا في كلام قبيح بردو....ده انا عارف اكتر منهم !!!
ويتكون عند الطفل سلبيا.....عدم مشاركه ابيه ومحسن بيه وغيره ..من المناقشه والحوار
والا يفكر مره اخري في حلول مثل ال " كزا بالجبنه" لانه تكون عنده ان تفكيره في حل مشكلات .....ما هي الا ...... " قباحه "
----------------
يجلس الطفل المسكين في غرفته - طفل تاني مش بتاع محسن بيه -
فتدخل عليه والدته الغرفه ..لكي تبحث عن شيء ما ..
فيقول لها ..: ماما ..انا عايز نفكر انا وانتي نعمل مشروع كزا كزا كزا
ماما : هههههه يا حبيبي انت لسه صغير...لما تكبر يا حبيبي نبقي نفكر تعمل مشروع
ركز دلوقتي في دراستك
ملحوظه : دراستك ..المتعلقه بكل ما هو متخلف في المدرسه ..يصب لدي الاولاد صب...عشان الولد يبقي متخلف
....
يكبر الولد ....ماما انا عايز نفكر انا وانتي وبابا نعمل مشروع كزا كزاكزا ..وانا معايا التخطيط
ماما : يا حبيبي لما تكبر...ابوك مش فاضي وانت لسه صغير...ركز في دراستك واخلص منها الاول يا حبيبي
وبعدين ابقي اعمل الي انت عايزه ..ان شاء الله تولع في نفسك
دراستك : مرحله اكثر تخلفها من سابقيها
.....
يكبر الولد فحت ...ماما ..انا بفكر انا وبابا نعمل مشروع كزا كزا ..والارباح هتكون كزا كزا ..وده هيساعدنا في تخطيط لشركه كبيره ان شاء الله
ماما : بص يا محمود يابني..انت تخلص دراستك وتتخرج..وبعدين تشوف مع ابوك ..انا ماليش دعوه بالحاجات دي يابني ...دراستك وشهادتك اهم من الي انت بتقولو ده
دراستك وشهادتك : اي خريج ذو شهاده ..يكسب لقب عاطل بدرجه امتياز
يتسائل الشخص الكبير..المتكون في داخله طفل حزين منكسر : ايه العيله المنيله بنيله دي ...مش عامل مشاريع..وان شاء الله عني ماعملت حاجه
-----------------------
طفل ذو اربعه سنين او اقل او اكثر.....يكون مش عايز ينام ...
تيجي امه وهيا شعرها منكوش كده..وحالتها
حاله : لو منمتش هجبلك ام رجل مسلوخه ..وابو رجل مسلوخه...وام عبايه مشلوحه ...وابو ايد مسلوؤه !!!!!!!!
الواد يعيني يجيله تخلف ذهني لا ارادي..عن عالم الاشباح الي هوا عايش معاه ده .." ايه ام عبايه مشلوحه دي ؟ "
طفل تاني :
امه تيجي تقوله : بص يا حبيبي متعملش كده ..عشان العو هيجي ياكلك ..وتبقي واوا ..ونجبلك هايفا تبوس الواوا
--------------------------------------------
المثال الاخير ..والاكثر انتشارا ..وبعديها تحليل منطقي
يكون مثلا الاب والام بيتكلموا في حاجه خصوصيه " وليكن مصروف البيت "
يجي الابن يتدخل في حاجه ..يقوم حد منهم - الاب او الام - وليكن الاب
الاب : بس انت !!!!
يتسائل الطفل : بس ليه ؟؟
الاب : ملكش دعوه ..خليك في حالك !!
الطفل : ليه بردو ؟؟
الاب : ده انت عيل رخم صحيح..هو كده ملكش دعوه انت " ويقوم يسفخه المين "
----------------------------------------
قد نفعل اشياء...لا ندرك مدي خطورتها..........
تيجي الام او الاب....في مرحله مراهقه ابنهم....يتسائلون...
" ليه الواد مبيشاركنيش في الحوار "
" ليه الواد مبيفكرش بطريقه منطقيه "
" ليه البت مش عايزه تساعدني في المطبخ "
" الواد طالع غبي ليه ...لا انا ولا امه اغبيا " - ده هو الي مقتنع بكده -
ولكن في الاصل.....هم الذين لم يربوا في اولادهم.....التواصل او الذكاء او او او
يظل الطفل يعامل معامله الطفل حتي يبلغ مرحله المراهقه .....ملازم يطلع متخلف طبعا !!!
اكثر الناس ذكائا واستيعابا للامور...هتلاقي وهما صغيرين.....والديهم..بيعاملهم علي انهم اذكياء..او كبار
ده بينمي الذكاء لا ارادي في العقل الباطن...انت بتتعامل انك ذكي....فلازم تطلع ذكي
انما الابهات والامهات الي فوق ...بيعاملوا الطفل ..انه تافه ولا له اي لزمه..ومينفعش يفكر
ومينفعش يتواصل مع والديه ..في اي شيء....فيطلع الواد متدمر يا حبه عيني !!
وفي تصرفات بنيه طيبه بتتفهم غلط من عند الطفل
يبقي الواد عنده اربعه سنين ..وامه تقوله : يا خلاااااااسي كوتي كوتي كوتي انجيغغغااا !!!
الواد يقول في نفسه : عبيطه دي ولا ايه ...مبتتكلمش عدل ليه ..اتخرست !!
في الحقيقه الواد مبيقولش كده جوا نفسه ..انما هو بيتقبل انه يتعامل ك عبيط
فبيطلع عبيط ...
الواد بردو كام سنه...بيبقي ماشي في بيتهم ..تطلع امه زي الغول وتقوله " بخ !!!!! "
الواد يتسرع يعني....يخاف من امه بعد كده
الواد يجي يشتكي لابوه حصل كزا كزا في المدرسه....يبوه يقوم يرنه علقه ..تعرفه ان الله حق
طبعا مش هيجي يشتكيلك تاني !! ..وهيبقي عنده قصر تواصل مع الناس
وبالتالي هيطلع متخلف
ناصر عفيفي - والدي رحمه الله عليه -
هو سبب اني بكتب المقاله دي دلوقتي
كان من صغري..يعاملني علي اني ذكي ..ورجل كبير...وذو شأن
كان بيتكلم معايا في السياسه من و انا اربع سنين ..
كنت متقن الكمبيوتر واوامر " الدوس " من وانا خمس سنين
كنت بخش علي النت من وانا عندي ست سنين.." كان ساعتها النت بالزمبللك "
كان ممكن ياخدني ونخرج بليل انا وهوا رحمه الله عليه ...ويقعد معايا كانه قاعد مع واحد صحبه
وكان بياخدي ديما مع صحابه الي بيخرج معاهم..ولما اجي اناقشهم ..يسمعولي كاني فرد منهم
لما تيجي تعامل ابنك علي انه غبي ..حتي لو كان في اقصي صغره..لازم يطلع غبي
الحل والنصيحه وكل حاجه حلوه :
هتخسر ايه لما تسمع لابنك .في رأيه ....ولا حاجه
هتخسر ايه لما تعامل ابنك علي انه راجل وقد المسؤوليه..وله صوت مسموع ...نو ثينج = No Thing
هتخسري ايه لما بنتك تيجي تساعدك في المطبخ..وتكسرلها طبق..مش مشكله خد الشر وراح
واحتويها وعرفيها ازاي متكسرش طبق تاني.....والبنت هتحبك وتساعدك لما تكبري وتعجزي ومتلاقيش الي يشيلك
حينما تنهي ابنك عن شيء ما مثل : اسكت انت !!!
وضح له السبب..ويكن سبب مقنع..حتي ميقفلش منك..وميحبكش..وميتواصلش معاك تاني
..والنصيحه الاهم والاكثر اهميه :
دائما عامل ابنك علي انه ذكي - ولكن احذر الغرور - ..عامله علي انه قادر علي التصرف في المشكلات
واذا احتاج مساعده ف انت موجود..عامله علي انه من اذكياء العالم..في حل كل شيء..
عامله انه محلل سياسي يستطيع مشاركتك في مناقشاتك السياسيه وغيرها
عامله علي انه يتملك عقل رهيب...حتي يمتكله بالفعل في المستقبل
واجعل تواصلك انت وابنك ..تواصل صداقه ..وليس تواصل ممارسه سلطه
وصدقني...هيطلع من اذكياء العالم
هشام عفيفي
[list][*]
الرئيسية 
